Buka Palang Pintu

Betawi...Emang gak ade abisnye kalo di ceritain dari seninye sampe pakeannye, dari budayenye sampe makanannye banyak banget kalo mao di bahas satu persatu. Disine ane ade sedikit cerita mengenai adat perkawinannye, namenye ne adat Buka Palang Pintu, biasanye dipake pade saat menjelang acara nikahan. Tempoe doeloe emang diadaen udeh jadi ciri tiap kampung punye jagoannye masing-masing dan disine ditunjukin kebisaan jagoannye itu tempat, mulai dari pantunnye, rebananye, silatnye ame sikenye. Dan di jaman sekarang kudu di lestarien ame pemuda-pemudi jaman eni, jangan sampe kematian obor istilahnye ilang begitu aje, karena ne adat udeh jarang di peragaen. Kebanyakan jaman sekarang orang-orang udeh pade demen ame yang namenye orgen tunggal ame pentas dangdutan yang nggak ade artinye.

Pade dasarnye peserta yang ikut ngeramein acara eni terbagi menjadi dua, nyang satu di pihak penganten laki-laki, dan nyang satunye lage dipihak penganten perempuan. Biasanye acara eni diawali ame shalawat dustur namenye. Dimane sholawat eni dibacain sebelom penganten lelaki keluar dari rume maksudnye kate orang tue biar ne penganten selamet diperjalanan dan supaye dimudahin segale urusannye (pernikahannye). Abis entu mulain deh rebane dimaenin dan penganten lelaki berjalan diiringin ame alunan suare rebane menuju ke tempat / kediaman rumah penganten perempuannye. Singkat kate penganten lelaki dah nyampe di pekarangan rumah penganten perempuan (P), disinelah dimulainye acara Buka Palang Pintunye. Dari pihak penganten lelaki (L) mulain dengan mengucapkan salam.

(L) : "Assalamu'alaikum".

(P) : "Wa'alaikum salam ... ee ...ade ape neh rame-rame.

(L) : "Aye numpang nanya bang, ape bener eni rumahnye babe ..... (sesuai nama ybs)
nyang anaknye namenye si ..... (sesuai nama ybs) bang???"

(P) : "Emang bener, ade keperluan ape elu nemuin babe ..... (sesuai nama ybs)???"

(L) : "Begine bang.....
Pepaye mateng dari keramat
keramat ade dikampung lime
aye dateng memberi hormat
kepade abang si tuan rume"

(P) : "Tuan rume memberi hormat
ikan pesut dalem lemari
gue ucapin dengan selamet
maksud ape lu dateng kemari"

(L) : "Ikan pesut dalem lemari
pegi kepasar berame - rame
emang sengaje aye kemari
maksudnye mao' silaturrahmi"

(P) : "Silaturrahmi emang disuru
di umat kite beturu - turu
emang entu ajaran guru
Supaye kite kagak keliru"

(L) : "Tapi, begine bang .............
Layang - layang terbang melayang
bagus bulunye si burung camar
udeh dipandang udeh dikenang
sekalian juge nih bang ... mao' ngelamar"

(P) : "Ape??? ngelamarrrrr ....... (terkejut)
ape gue nggak salah denger"

(L) : "Kagak salah bang, buat tuan mude kite.
nto die orangnye, namenye bang ..... (sesuai nama ybs)"

(P) : "Gulali gule lakse
dijual dipasar kaen
kalo si .... (sesuai nama ybs) ogah jangan dipakse
bole lu cari perempuan laen"

(L) : "Diatas minyak dibawah aer
tenge - tenge sumbu apinye
emang banyak perempuan laen
enggak same jantung atinye"

(P) : "Siburung camar bagus bulunye
kayu asem banyak uratnye
kalo lu mao' ngelamar, bole - bole aje
kudu' lu tau sarat - saratnye"

(L) : "Kayu asem banyak uratnye
poon kembang ditiup angin
kalo aye bole tau ape sarat - saratnye
coba deh abang tulung bilangin"

(P) : "Malem - malem isep cerutu
ketan tetelnye dibumbuen
disine ade due palang pintu
kalo lu sanggup coba rubuen"

(L) : "Pegi kepasar beli sepatu
jalan - jalan ke kali bata
jangan kate due palang pintu
palang pintu kerete, aye sanggup bikin rata"

(P) : "Maen kromong gendang dipukul
mane robane beiring - iring
jangan ngomong lu aje nyang sebakul
nyang gue liat sajiannye enggak sepiring"

(L) : "Baek deh bang ......................
Disine kentang disito kentang
kentang sepikul dipece tige
disine nantang disito nantang
disine mukul disito jage
Bang ..... (sebut nama si pesilat) maju deh rubuen tuh palang pintunye".

(P) : "Baek deh kalo mao' lu begito. Bang....(sebut nama si pesilat)
ladenin toh jagoan dari kampung .... (sebut nama kampung penganten lelaki)".

( Disine jagoan dari kedua belah pihak begebrak (betarung) saling menjatuhkan satu sama lain. Biasanye dari pihak perempuan memasang 2 jagoan biar pertarungannye keliatan lebih seru, tapi biar kate jagoan dari pihak lelaki cuman satu, jangan sampe die kalah. Soalnye kalo kalah bisa berabe, penganten lelaki gak bisa melangsungkan pernikahannye ame penganten perempuan. Soalnye salah satu syaratnye kudu mengalahkan jagoan dari kubu penganten perempuan. Selesai pertarungan yang dimenangkan jagoan dari pihak penganten lelaki, selanjutnya )

(L) : "Jalan - jalan kepulo gebang
kue satunye dibumbuen
kalo aye bole tanya, pegimane bang?
palang pintunye udeh aye rubuen"

(P) : "Kue satu dibumbuen
satu lagi care bikenye
palang pintunye udeh lu rubuen
satu lagi lagu sikenye"

(L) : "Sabar yeee bang ... bang (sebut nama pelantun sike) abang tariken suara abang, biar die tau kite gak bisa disembarangin"

( Disine dibacaen/dilantunen lagu sike dengan alunan yang gemulai seperti pembacaan sholawat atau kebanyakan orang sedang mengaji, selanjutnya ).

(L) : "Nah bang, pegimane? segale persyaratannye udeh aye jalanin, ape aye ame rombongan udeh bole masup ne?......"

(P) : "Bue duku bue rambutan
baju ijo jato ditane
orang satu jadi rebutan
kalo dah jodo gak bakal kemane

baek deh segale syaratnye elu ude jalanin, sekarang elu bole masup deh ame
rombongan ...."

(L) : "Ntar dolo' bang .......
Antri minyak dibekasi
maen peluru ditenge malem
aye ame rombangan ucapen banyak terima kasih
kerna abang, suru aye masup ke dalem".

Dalem hal eni yg berperan sebagai pengarang dialog eni adalah Bpk M Akib Hamzah dan dibantu oleh rekan-rekan nyang laennye. Beliau adalah salah satu pendiri group kesenian betawi asal tenabang nyang dulu namenye IRSI nyang sekarang berubah namenye jadi ISBAT.